ამერიკის შეერთებული შტატების სურსათისა და მედიკამენტების ხარისხის კონტროლის სააგენტომ (FDA) ადამიანის იმუნოდეფიციტური ვირუსის (HIV-ის) საწინააღმდეგო პირველი ხანგრძლივი მოქმედების საინექციო პრეპარატი “აპრეტუდი” დაამტკიცა.
FDA-ს რეკომენდაციით, მედიკამენტის გამოყენება აივ-ით ინფიცირების რისკის ქვეშ მყოფი იმ მოზარდებისა და მოზრდილებისთვის არის დაშვებული, რომლებიც მინიმუმ 35 კილოგრამს იწონიან. საწყის ეტაპზე “აპრეტუდის” ორი დოზა ერთი თვის ინტერვალით უნდა გაკეთდეს. ამის შემდეგ ინიექცია ყოველ ორ თვეში ერთხელ იქნება საჭირო.
“აპრეტუდი” პრეექსპოზიციური პროფილაქტიკისთვის განკუთვნილი აბების, “ტრუვადასა” და “დესკოვის” ალტერნატივაა. საგულისხმოა, რომ ამ წამლების ყოველდღიური მიღების შემთხვევაში აივ-ით ინფიცირების რისკი 99%-ით მცირდება.
მედიკამენტის დამტკიცებამდე FDA-მ ვაქცინის უსაფრთხოებასა და ეფექტიანობაში დასარწმუნებლად ორი კვლევა ჩაატარა. ცდებმა აჩვენა, რომ Apretude-მა “აივ”-ით ინფიცირების რისკი ცისგენდერ კაცებსა და ტრანსგენდერ ქალებში, რომლებსაც სექსუალური ურთიერთობა მამრობითი სქესის წარმომადგენლებთან ჰქონდათ, 69%-ით შეამცირა, ხოლო ცისგენდერ ქალებში – 90%-ით.
კვლევის ავტორთა განცხადებით, მედიკამენტის მაღალი ეფექტიანობა გამოწვეული იყო იმით, რომ ცდისპირები ინიექციის რეჟიმს ზედმიწევნით იცავდნენ, რაც საკმაოდ რთულია აივ-ის საწინააღმდეგო აბების შემთხვევაში, ვინაიდან საუკეთესო შედეგის მისაღწევად მათი ყოველდღიურად მიღებაა საჭირო.